Nyobain duren tujuh rebu lima ratus sebiji

18 02 2008


Musim ujan kayak gini sebenernya kagak resep makan duren. Apalagi duren nyang lokal punya. Anyep gitu…

Tapi kalo ada waktu dan emang kepengen makan tuh buah yang kulitnya ada durinye, boleh deh sekali-kali ngelancong ke arah timur kota Jakarte.

Tempatnye dari kolong jembatan by pass Jatinegara sampe kolong jembatan layang Klender. Di pinggir jalan kereta. Penjual duren bejibun banyaknye. Tumplek-bleg.

Nyang jualannye pake mobil pik-ap, ada yang pake sepeda. Nyang dipikul juga ade. Terserah tinggal pilih aje mau nyang mane.

Biasanye orang-orang yang pulang ngantor seringnye mampir di mari, bisa makan di situ atau dibawa pulang, terserah deh. Tapi kalo mau aman mending makan disitu aje. Bukan kenape-kenape, kalo nongkrong disitu kan nyang milihin durennye si abang yang ngejual. Jadi kalo durennya busuk atau nggak bagus boleh dituker.

Kalo buat dibawa ke rumah, kan untung-untungan. Kalo rejeki dapet nyang bagus, kalo isinye jelek ye.. terima aje.

Gue sendiri sih nggak begitu ‘panatik’ sama nih buah, dari baunye aje udah bikin kepale pusing, tapi karena anak gue, Kemal pengen banget ngerasain buah duren, mangkanye gue sempetin ngajakin die mampir di mari.

Harganye juga cuman tujuh ribu lima ratus perak. Tapi jangan geer dulu bilang murah, karena harga segitu cuman dapat dituker sama sebiji duren kecil. Kalo dipikir duit segitu emang bakalan dapat duren bangkok? Ye, kagak. Kalo duren bangkok kan bisa sampe ratusan ribu harganye. Jangan bandingin same duren lokal kayak nyang dijual disini.

Setelah minta dipilihin sama abangnye, dapet deh satu biji duren yang lumayan gede. Ade lima mata nyang semuanye mulus dan warnanye kuning pucet.

Abis duren dibukain sama abangnye, tiba-tiba anak gue nggak mau. Wah payah nih bocah. Udah dibeliin nggak mau dimakan. Baunye nggak enak pak!, katanye sembari nutupin idungnye.

Masak duren udah dibayar nggak dimakan, terpaksa deh.. gue nyang ngabisin, walaupun sebenernya kepala gue udah kliyengan, nggak tahan baunye. Sepuluh menit tandas deh duren yang kata abangnye dikirim dari Medan. (Ah… abang bisa aja ngibulnye, paling-paling dari Parung atawa Purwarkarta).

Tapi gue kaget juga sih, ternyate duren nyang harganye tujuh rebu lima ratus perak, rasanya legit banget. Nggak kalah sama duren impor. Meski harganye murah, tapi rasanye nggak ngecewain.

Apalagi buat nyang gila makan duren, pastinye kagak lihat rupa, nyang penting baunye aje udah bikin ngiler. Masalah rasa same gedenya urusan belakangan. Udah gitu kan musim duren kan paling setahun dua kali. Jadi nyang penting kesampean deh makan durennye.

Jadi buat encang-encing, nyak-babe, mpok-abang yang pengen nyobain duren murah, boleh deh.. mampir ke sini. (*)

Iklan

Aksi

Information

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s




%d blogger menyukai ini: