Bang Sanip, mpok Indun dan Udin pergi ke DF

16 06 2008

“Nyak kite ke PRJ dong”, ujug-ujug Udin ngerengek ke enyaknye.

“PRJ? DFmaksud loh din,? enyak Indun balik tanya ke Udin.

“Iye nyak, Djakarte Fair nyang dulu adanye di Gambir, kan sekarang udah pindah ke Kemayoran. Emang enyak kagak tau?,” tanya Udin lagi. “Lah kagak tong,” saut mpok Indun.

“Pegimane nih bang, si Udin ngajakin ke PRJ, emang abang punya duit?,” tanya mpok Indun ke Sanip yang lagi asyik ngisep rokok ketengannya . “Gue sih kepengen juga ke sono, tapi kan elo tau, kite mesti pegang duit kagak sedikit,” jawab Sanip sambil terus ngepulin asep rokoknye.

“Coba elu itung aje, kalo karcis masuknye aje satu orang 20 rebu perak, kalo tiga orang kan 60 rebu. Belom lagi buat ngisi perut sama isi bensin motor gue. Paling sedikit kudu nyiapin duit 200 rebuan. Duit segitu buat nonton doang, kagak bisa beli ape-ape,” reken Sanip.

Emang bener, buat bang Sanip sama keluarganya yang tinggal di pinggiran selatan Jakarta, meski cuman liat-liat doang aje pastinye bakal keluar duit yang kagak sedikit. Ya.. masak ke sono ngiter-ngiter cuman makan angin doang. Sekagaknye kan pasti beli roti atawe gulali buat si Udin.

Sejak DJakarte Fair –orang Jakarta biasa bilang DF– dipindah dari lapangan Monas ke Kemayoran, keluarganye bang Sanip emang kagak pernah lagi tahu soal DF. Bukan ape-ape, sebab emang karena tempatnya jauh, juga susah kendaraannye. Belom lagi karcis masuknya yang tiap tahun naik terus.

“Jadi abang kagak bisa nih nganterin aye sama Udin ke PRJ,” tanya Indun lagi. “Ye ntar liat aje deh, mudah-mudahan gue ada rejeki,” timpal Sanip pelan.

Buat orang Betawi, DF emang punya keterikatan sejarah yang panjang. DF, dulu namenye pasar malam Gambir. Djakarta Fair pertame kali dibuka tahun 1968 same Presiden Soeharto. Di sini biasanye, tetek-bengek soal Betawi pasti ade. Ikon ondel-ondel sama kerak telor nongol tiap tahunnye.

Pengunjung same peserta PRJ tiap tahunnye juga terus ngebludak. Dari cuman pasar malam, terus “bermutasi” jadi tempat pameran modern yang nampilin barang-barang baru. Tempatnye juga makin lebar. Dari cuman tujuh hektare pas ada di Monas, jadi 44 hektar sewaktu tahun 1992 pindah ke Kemayoran.

Nah ceritanye, buat modal ke PRJ, bang Sanip terus kejar setoran, dari abis Subuh sampe mau maghrib Sanip terus ngojek. Satu minggu duitnya udah lumayan ngumpul, die itung-itung dapet hampir dua ratus rebu. “Lumayan deh dapatnye. Kurangnye ntar biar gue pinjem same kong haji Manap.  Yang penting gue bisa nyenengin anak-bini,” pikirnya dalam hati.

Sampe di rumah, bang Sanip langsung nyamperin bininye yang lagi nyetrika, “Ndun, bilangin same Udin, besok minggu kite jadi pergi ke PRJ,”.

“Ah.. nyang bener bang,”? sergah Indun setengah kagak percaya. “Ya masak elu kagak percaya ama gue, ape gue pernah bohong same elu,” kata Sanip rada senewen. “Iye… iye aye percaye same abang,” sahut Indun yang mukenye jadi merah kayak kepiting rebus.

Nggak lama, si Udin juga udah nongol. Die tahu babenya pulang, makanye dia yang lagi main gundu same temen-temennye di bawah pohon buni langsung deh ngibrit pulang ke rumah.

Udin berasa babenye pulang bakalan kasih kabar gembira kayak gini. Makanya die buru-buru pulang. “Nyak kite jadi ke PRJ,” Udin nanyain enyaknye sambil napasnye ngos-ngosan. “Jadi din, udah besok kite ke sane betiga, tapi elu ntar di sono jangan minta macem-macem,” kata Sanip pelan.

“Iye be, Udin ngarti, babe kagak punya banyak duit,” jawab Udin.

Udin yang emang jarang diajak pergi jalan-jalan ame nyak-babenye, tiba-tiba ngerangkul bang Sanip. Dia seneng kagak kepalang. Babenya yang cuman tukang ojek ternyata bisa ngajak dia sama enyaknya ke PRJ.

“Tiap solat abis Udin bedoa buat babe, supaya babe digampangin rejekinye, supaye kite bisa jalan-jalan” kata Udin ngebisik kuping babenye. Bang Sanip terharu kedengerin omongan Udin. Dia terus ngerangkul Udin sambil ngelus rambut anak yang semata wayang entu. (*)

 

Iklan

Aksi

Information

2 responses

12 09 2008
anastom.sy

mung.
nih kel. bang sanip tinggalnya dimane sich.
kadang di pinggiran timur jakarta. kadang di pinggirang selatan jakarta.
besok di utara kale, trus minggu depan di kebon sirih kaleeeeee
ha..ha..ha…

15 09 2008
imung murtiyoso

wah saya jawab satu-satu nih pak Tom:
1. ternyata the Reds “lebih merah” dari MU;
2. betul saya emang termasuk fan Liverpool, dan saya tahu pak Tom fan berat Jose Mourinho, bukan fan Chelsea atau Inter 🙂
3. sebenarnya saya emang takut, untung aja nggak ngegantung di lt. 19-20. bisa2 saya pingsan 🙂
4. thank pak Tom, yg betul di pinggiran selatan Jakarta ..

terima kasih komennya

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s




%d blogger menyukai ini: