Baju lebaran buat Udin

17 09 2008

Dua minggu lagi mau lebaran, tapi naga-naganya belum kedengeran si Udin dibeliin baju lebaran sama babenye, bang Sanip. Padahal temen-temennye udah pada dibeliin dan pamerin tuh baju lebaran sama Udin.

Sebenernya Sanip tahu banget kalo anaknye bakalan nagih minta dibeliin baju lebaran juga, tapi sampe sekarang si Udin nggak ngomong barang sedikitpun soal baju lebaran.

“Dun… Indun, kenape tumbenan Udin nggak ngerengek minta dibeliin baju lebaran, biasanye hari gini udah narik-narik elu ke pasar,” tanya bang Sanip ke mpok Indun, istrinya yang lagi nyiapin buka puasa.

“Barangkali tuh anak udah ngerti kalo babenye nggak punya THR kayak orang kantoran,” jawab Indun sambil ngaduk teh manis panas. “Emang abang nggak punya duit buat beliin baju lebaran buat Udin barang sepotong aje,” Induk balik tanya.

“Mudah-mudahan ntar ade rejeki, pan lebarannye juge masih lama, masih dua minggu lagi,” timpal Sanip sambil muterin gelombang radio dua band nyari siaran ceramah agama. 

“Emang kalo dua minggu besok bakalan ada yang nganterin duit buat kite? Jangan ngayal bang, kalo nggak kerja pegimane dapat duit,” saut Indun rada sewot.

Menjelang lebaran kayak gini keluarga bang Sanip emang bingung banget. Usaha Sanip yang cuman ngojeg kan nggak jelas penghasilannye. Kalo ada banyak yang make jasanya, die bakalan dapet duit, tapi kalo sepi paling cuman bawa pulang lima belas rebu.

Sementara bininye, Indun kadang-kadang jualan gorengan yang dititipin di warung-warung buat bantuincari duit. Itu juga untungnye nggak seberape. Paling buat makan sehari-hari. Buat bayar sekolah Udin terpaksa Sanip yang jungkir balik cari rejeki.

“Begini dun, kemaren pak haji Mansyur yang punya toko kue di pasar Belimbing udah nawarin gue buat nganterin pesenan kue sama parsel ke pelanggannye,” jawab Sanip ngeyakinin bininye. “Die bilang sekali nganter gue bakalan dapat persenan sepuluh ribu. Kali-kali aje yang beli kue sama parsel banyak, jadinye gue bisa beliin baju buat elu sama Udin,” tambah Sanip.

“Oh… gitu bang, ane kan kagak tau abang bakalan dikasih kerjaan sama haji Mansyur, ye udeh mudah-mudahan banyak yang beli kuenye haji Mansyur, supaye abang juga bisa bawa duit banyak” kata Indun sambil senyum. “Tapi bang mulai kapan abang bakalan nganterin tuh kue-kue,” tanya Indun lagi.

“Besok… rencananya sih besok, sebab tadi pagi gue udah ketemu sama haji Mansyur supaye besok gue udah siap kalo-kalo ade yang minta dianterin kue atau parsel lebaran,” jawab Sanip.

“Nyang penting abang ati-ati aje jangan sampe ngecewain haji Mansyur. Entu semuanye kan pelanggan setia tokonya die, jadinye abang jangan sampe telat nganterinnye,” Indun wanti-wanti lakinye.

“Iye dun…. doain aje mudah-mudahan gue dapat rejeki buat lebaran kite tahun sekarang,” pinta Sanip ke bininye.

Sepuluh hari udah Sanip kerja di tempatnye haji Mansyur, selama itu pula die keliatan semangat banget, jam tujuh pagi udah keluar rumah dan balik jam setengah tujuh malam. Kadang-kadang tengah hari die pulang sebentar cuman buat nengokin anak-bininye di rumah, nggak lama sih paling-paling cuman lima belas menit.

Nggak biasanye, siang entu Sanip pulang agak sorean. Die keliatan buru-buru turun dari motornye dan langsung nyelonong masuk rumah. Di tangan kirinye ade amplop warna coklat.

“Assalamualaikum… Dun, dun.. kemane si Udin,” teriak Sanip kayak orang yang kebakaran jenggot.

“Kum salam, ada ape sih bang teriak-teriak gitu, aye juga denger, kuping aye kagak budek,” sergah Indun dari dalam rumah.

“Maap deh, bukan ape-ape gue girang banget, nih haji Mansyur udah ngasih komisi buat gue. Lumayan dun, kayaknya die ngasih lebih buat gue deh. Nih rejeki bulan puasa buat keluarga kite.” kata Sanip ngos-ngosan.

“Emang haji Mansyur ngasih komisi ke abang berapa duit,” tanya Indun nggak sabaran. “Tadinye gue kirain cuma dua ratus rebuan, sebab ada kira-kira dua puluh lebih yang udah gue anterin pesenannye, tapi nggak taunye die kasih gue dua kali lipetnye. Tuh haji emang baek banget,” jawab Sanip sambil ngitungin duit yang ada di amplop.

“Ada empat ratus dua puluh lima rebu dun. Udeh besok elu ke pasar beliin Udin baju lebaran,” kata Sanip kegirangan. “Aye juga pengen baju lebaran bang, masak cuman Udin doang,” rengek Indun. “Ah elu kayak anak kecil aje minta baju lebaran segala, mending duitnya buat bikin ketupat sama pindang bandeng,” jawab Sanip nasehatin bininye.

“Ade ape nyak, babe kok keliatannye seneng bener,” tiba-tiba Udin nongol dari belakang rumah. “Iye din babe lu mau beliin baju lebaran buat elu, die dapet rejeki dari haji Mansyur,” kata Indun.

“Horeee Udin punya baju lebaran,” teriak Udin sambil loncat kegirangan.

“Nyak besok kita ke mol aje ye, di sono bajunye bagus-bagus deh,” usul Udin ke enyaknye. “Kagak, ke pasar Belimbing aje, disitu juga cakep-cakep,” timpal Indun. “Tapi nyak di mol kagak becek, udah gitu adem lagi,” kata Udin.

“Din nih nyak bilangin, kalo kite ke mol, tuh duit paling-paling cuman dapet baju ama celana buat elu doang, ntar pas takbiran enyak kagak bisa bikin ketupat sama pindang bandeng kesukaan babe lu,” jawab mpok Indun ngejelasin ke Udin.

“Ini udah untung elu bisa kebeli baju lebaran, kalo babe lu nggak kerja di tempatnye haji Mansyur, elu kagak bakalan deh make baju baru,” tambah Indun. “Iye deh nyak Udin ngarti, yang penting pas hari lebaran, Udin bisa pake baju baru dan makan ketupat sama pindang bandeng,” kata Udin sembari lari ke luar rumah.

Udin pengen kasih tahu temennye, kalo dia juga bakalan pake baju lebaran dan makan enak. (*)

Iklan

Aksi

Information

One response

17 09 2009
MOEL

Gw .. demen nich gaye cetitenye ….. ade sedih, girang, ape lagi yeeeee

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s




%d blogger menyukai ini: