Udin masup sekolah jam 6.30

6 01 2009

“Peraturan pemda DKI soal jam masup anak sekolah di Jakarta kayaknya cuma mindahin jam macet doang,” Sanip bukan obrolan ke bininye Indun sambil manasin motor.

“Ah.. abang sok tau amat, pemerentah kan lebih tau ketimbang abang,” timpal Indun. “Ye.. barangkali belon biasa aje tuh anak sekolah masup lebih pagian, jadinye rada-rada macet,” tambahnya.

Sanip yang ngedengerin ocehan bininye cuman senyum-senyum doang. Dari dulu kelakuan bininye nggak berubah-ubah, soak tahu, katenye dalam hati. “Iye, dulu jalanan pas macet jam setengah tujuh,sekarang macetnya lebih pagi lagi. Jam enam udah ngerayap,” jawab Sanip.

“Buktinya si Udin nggak ngaruh tuh jam sekolah dirubah, tetap aje die nggak pernah telat masuk sekolah, dasar emang anak orang beduit aja tuh yang ngerasain macet, nyang sekolahnye naik mobil atau motor,” lanjut Indun.

“Elu perlu tahu ‘dun kalo si Udin pan sekolahnye dari sini aje cuman sepuluh menit jalan kaki. Kalo die lari kayak diuber setan paling tiga menit udah nyampe sekolah. Nggak perlu naik angkot,” tambah Sanip ngejelasin ke bininye nyang lagi manyun nungguin uang belanje.

Emang nggak ngaruh masup jam berape aja buat si Udin. Sebabnye pan udeh tahu, sekolahnye Udin nggak jauh-jauh banget dari rumahnye. Paling-paling selemparan batu doang.

Sanip yang tukang ojeg motor berani kasih penjelasan ke bininye sebabnye die paham bener keadaan jalanan di Jakarta, karena die tiap hari juga sering ngojekin anak sekolah.

“Mestinye pemda DKI jangan ngasih jam setengah tujuh buat masuk sekolah anak-anak, sebab bakalan nggak ngaruh. Dulu waktu masup jam tujuh, tuh anak-anak sekolah pade ikut bapaknye sekalian pergi ngantor. Nah sekarang, babenye mau nggak mau juga bakalan berangkat ngantor lebih pagi, ngikutin jam anak sekolah,” jelas Sanip.

“Jadi nggak ngaruh ya bang, jam sekolah dimajuin juga,” tanya Indun rada-rada kalem.

“Menurut gue nggak ngaruh. Coba elu liat, orang kantoran yang berangkat juga lebih pagi lagi, karena die sekalian nganterin anaknya sekolah. Belom lagi anak-anaknye orang gedongan nyang sekolahnya dianter mobil, tetap aje supirnya disuruh dateng lebih pagi lagi, betul nggak,? tanya Sanip ke Indun nyang masih bengong.

“Eh… iye bang bener banget tuh nyang abang bilang, kayaknya kalo cuman dimajuin setengah jam nggak ada ngaruhnya buat bikin jalan-jalan jadi lancar,” jawab Indun sambil nguap.

“Jadi solusinye pegimane bang?” tanya Indun lagi sambil cengengesan.

“Lagaklu pake solusi. Ngomong lu kayak nyang pernah makan bangku sekolahan aja. Bilang aje jalan keluarnye pegimane gitu ?” jawab Sanip sambil cengar-cengir dengerin omongan bininye.

“Ngomong salah, enggak ngomong salah, ah… terserah abang aje deh,” sergah Indun.

Dari dulu emang Sanip sama Indun kalo lagi ngomong nggak pernah akur, ribut melulu. Pade ngerasa paling pinter. Ntar ujug-ujungnye pade ketawe bareng-bareng deh tuh laki-bini. Pade ngetawain kekonyolannye.


“Kalo gue sih pengennye anak sekolah masup jam sembilan pagi. Bukan ape-ape, kalo jam segitu gue pastiin nggak bakalan macet, sebab orang-orang nyang kerja udah pade nggak ade. Nah pulangnye pan bisa jam satu atau jam dua siang,” jelas Sanip lagaknye kayak pegawai kelurahan.

“Nyang sekolahnye siang pegimane bang,” potong Indun.

“Selame ini pan nggak ngaruh nyang pade masup sekolah siang. Paling pulangnye aje nyang rada-rada telat. Nyang paling pentingkan nyang masup pagi, gitu ndun,” ucap Sanip ngejelasin bininye.

Meski tukang ojeg, otak bang Sanip lumayan pinter, karena dia paling demen baca koran seribuan nyang dibaca rame-rame di pangkalan ojeg. Jadi die tau kejadian-kejadian di ibukota.

Nggak lama tiba-tiba Udin udah nongol di depan pintu udah pake seragam sekolah komplit. “Nyak, babe Udin berangkat sekolah dulu ye, ntar udin ketelatan lagi. Assalamualaikun,” kata Udin bersemangat.

“Eh din, elu nggak salah, jam berape sekarang. Pagi-pagi bener berangkatnye, emang elu mau ngepel sekolahan,” tanya enyaknye rada sewot.

“Ye.. enyak emang enggak tau, pan sekarang masup sekolah dimajuin jadi jam setengah tujuh,” jawab Udin sambil ngeloyor pergi.

“Indun… indun… elu parah banget sih! barusan kan kite omongin soal jam sekolah, eh… sekarang elu malah nanyain Udin, sebenernye elu ngarti apa kagak sih?!” sahut Sanip sambil melotot. (*)

Iklan

Aksi

Information

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s




%d blogger menyukai ini: